Два беспилотни летала беа соборени во неделата над ирачката воздушна база во која се сместени американски војници и ирачки и коалициски сили, се вели во соопштението на ирачката војска.
Системот за противвоздушна одбрана во воздухопловната база Ал Асад, една од најголемите и најстарите воени бази во Ирак, ги пресретна и ги собори беспилотните летала, се вели во соопштението.
Неколку часа претходно, Центарот за дипломатска поддршка во Багдад (BDSC) во ирачката престолнина беше нападнат со една ракета, објави портпаролот на коалицијата предводена од САД, Вејн Марото во твит. „Ракетата паднала во близина на БДСЦ и не предизвикала повредени или штета. Нападот е под истрага“, додаде тој.
Во друг твит, Марото рече дека секој напад против ирачката влада, Курдистанскиот регион во Ирак „и коалицијата ги поткопува авторитетот на ирачките институции, владеењето на правото и ирачкиот национален суверенитет“.
Не е јасно кој ги лансирал беспилотните летала над базата или кој стои зад ракетниот напад во БДСЦ.
Минатата година, воздухопловната база Ал Асад беше нападната со проектили од Иран како одговор на нападот во близина на аеродромот во Багдад во кој беше убиен најмоќниот ирански воен командант, Касем Сулејмани.
Провинцијата Анбар, каде што се наоѓа базата, беше жариште на активностите на ИСИС во западен Ирак помеѓу 2014 и 2017 година.
Администрацијата на Бајден очекува евентуално повлекување на американските трупи од Ирак, бидејќи безбедносните сили на земјата стануваат поспособни и заканата од ИСИС опаѓа, објавија двете земји во заедничката изјава во април.
САД имаат околу 2.500 војници во Ирак како дел од операцијата Инхерентна Резолуција, глобалната коалиција за поразување на она што остана од калифатот на ИСИС кој претходно контролираше делови од Ирак и Сирија.
Војниците сега се префрлија на обука и советодавни задачи, „со тоа овозможувајќи прераспоредување на сите преостанати сили од Ирак“, се вели во заедничката американско-ирачка изјава.
----------------CNN
